Құрметті: Әріптестер, ата-аналар, және шәкірттер!!!
«МЕКТЕБІМ – МЕЙІРІМ МЕКЕНІ» тақырыбындағы алғашқы қоңырау салтанатты жиынына қош келдіңіздер!!!
Мектебіміздің өткен оқу жылындағы жетістіктері мен алдағы міндеттерге тоқталатын болсам: ақпан айында Ө.Жәнібеков атындағы №4 жалпы орта лицей-интернаты Ы.Алтынсарин атындағы Ұлттық білім академиясының ұсынысымен «Назарбаев Зияткерлік мектептері» дербес білім беру ұйымының, «Қазақстан халқына» қоғамдық әлеуметтік қоры, «Білім саласын тұрақты дамыту» қоры, Beeline Қазақстан және aitas.kz компаниясының қолдауымен «Ауылдық аймақтардағы тірек мектептерінің әлеуетін арттыру» қайырымдылық жобасы аясында 2500000 (екі жүз елу миллион) теңге көлемінде материалдық-техникалық базасы жабдықталды.
Қазақстан Республикасы Үкіметінің 2023 жылғы 28 наурыздағы №249 қаулысымен бекітілген Қазақстан Республикасында мектепке дейінгі, орта, техникалық және кәсіптік білім беруді дамытудың 2023–2029 жылдарға арналған тұжырымдамасын жүзеге асыру аясында негізгі орта білім беруде академиялық білімге, функционалдық сауаттылықты қалыптастыруға, пәндік, метапәндік дағдылар мен құзыреттерді дамытуға, STEM-тәсілі негізінде оқытуға, тәрбиелік компонентті күшейтуге және инклюзивті орта қалыптастыруға баса назар аударылатын болады.
Тәрбие жұмысын ұйымдастыру кезіндегі басым бағыт – балаға қамқорлық пен құрмет көрсету, сенім арту, балалардың құқықтары мен заңды мүдделерін қамтамасыз ету, оларды кемсітуге жол бермеу болып табылады. 2023-2024 оқу жылында мектептердің ата-аналар қауымдастығымен өзара іс-қимылы негізінде тәрбие міндеттерін іске асыруда «Ата-аналар академиясын» құру, сондай-ақ «Тоғыз ай – 9 іс-шара», «4 тоқсан – 4 өнер» жобалары шеңберінде іс-шаралар өткізу, мерейтойлық күндерге арналған сыныптан тыс ісшараларды ұйымдастыру маңызды аспектілер болып табылады.
Өткен оқу жылын 1-11 сыныптарда 943 оқушы, мектепалды даярлық топтарында 42 тәрбиеленуші бітіріп, 79 бітіруші түлектерден 10 оқушы «Алтын белгі» иегері, 12 оқушы «Үздік аттестат» иегері атанып, 55 бітіруші мемлекеттік грант жеңімпазы болып, 70%-ды құрады. «Саналы тәрбие, сапалы білім» білім беруде аянбай еңбек еткен 120 педагог пен 50 тәрбиешінің еңбегі яғни білім сапасы 64%-ға жетті. Оқушылардың пәндік олимпиадасының аудандық кезеңінен 36 оқушы жүлделі орындар иеленіп, облыстық кезеңнен
7 оқушымыз мектеп мерейін асқақтатты. Атап айтып кететін жетістік: Қалаш Нұртөре Халықаралық әл-Фараби олимпиадасының жеңімпазы атанып, Әл-Фараби атындағы Қазақ Ұлттық университетінің грантын иеленді, 8 сынып оқушысы Мұсаханұлы Бимұхаммед «Мағжан оқулары» байқауының аудандық, облыстық кезеңдерінде топ жарып, республикалық кезеңінде «Алғыс хат» иеленді.
2023-2024 оқу жылын 1-11 сыныптарда 1063 оқушымен, мектепалды даярлық топтарында 46 оқушы жалпы 1109 тәрбиеленушімен бастағалы отырмыз. Мектеп ұжымының негізгі мақсат-міндеті білім сапасын көтере отырып, республикалық «Жылдың 100 үздік мектебі» тізіміне қол жеткізу.
Зейін қойып тыңдағандарыңызға рақмет!!!